馬伕？

９個發夢的女子
一個由大細、鳳凰卷組成的地方

一名身不由己、精神過度緊張的女子，忽爾反思起來。

她的杯薪，就是靠這９個坦胸露臂的女子，出賣她們的色相、見底的智慧、任人評頭品足、超過２０小時的工作時間、被人喝罵等等換來。

他安慰說：沒有迫良為娼 。

雖不是依靠妓女維生，但程度與馬伕又相去多遠？

９個女子以此換取一個名成利就的機會，而她就以此換取維持基本生活的一個數字。

從工作的觀點上出發，對實際工作經驗只有７個月的她來說，實在是一個難得的經驗，但同時又違反了她的一向抱持的看法。

既不屑，又渴求。矛盾從無休止。

貪

佛家說造成痛苦最大的三種邪惡是「貪、嗔、痴」。

慧根有限，只知自己有四貪：貪玩、貪吃、貪睡、貪靚。

貪玩，皆凡玩的都喜歡，曾經有段時間，晚晚流連於K場、波場、同酒吧，又有段時間晚晚唔捨得返屋企，唔去吹水唔安樂。仍然奉行「逢約必赴、逢玩必到」呢條金科玉律，不過當然要得到精神、時間與金錢三位首肯。

貪吃，唔係食得乜都貪，特嗜甜食，但又唔係甜既就擺落口，朱古力有VIP優先權，所以佢既親戚，朱古力雪糕、朱古力蛋糕、朱古力餅乾，都有特別優待。

不過，呢類高糖、高脂食物，都唔可以多吃，加上本人QUOTA有限，所以係一早就經已發出通知，將胃部正式劃分為正餐部及甜品部，而正餐部將會實行精簡架構，而甜品部則作有限度擴充。

貪睡，要講句「TOUCH WOOD」同「托賴」先，皆因天生小氣，驚講完會賴嘢。話說無論瞓咗幾耐，抑或啱啱瞓醒，都有再瞓既能力，仲可以好「腍」，更一度懷疑家有瞓神。為怕失去呢種特異功能，都係小心講嘢為妙。

貪靚，可以話係一個突變既過程，猶記得着住校服既日子，係零打扮、零貪靚，連洗面要用潔面乳都唔曉，即使係唔着校服果４年都係hea絕寶馬山。點知唔再返學，先至驚覺年華有限，何不趁僅有的時間，每天自己開心一下！

這四貪相信在知時間內都不會離開。喃嘸啊呢陀佛！

天生犯賤

死法只得兩種。
一種係辛苦到死，
一種係得閒到死。

捱咗個幾月，仲可以自我感覺良好。
hea咗一日，經已叫苦連天。

莫非我真係天生犯賤？

根據所有道聽途說既玄學理論，天生勞碌命的，有以下特徵：
1.骨粗
2.手掌硬
3.腰粗
4.事業線深且長
5.大節出生(據說命硬，所以唔會有悠既日子過)
6.背後有痣

不幸地，全中，再加上秤骨、姓名學、出生時辰，唔係大器晚成，就係苦盡甘來，喂，不勞而獲，得唔得呀？

夜遇餓犬

一向自恃膽生毛，乜都唔驚，但係今晚確實有驚既感覺......

在凌晨時份，乘搭一輛價值二百多萬的環保型回家，怎料改站，被迫在離家200米的地方下車，雖則是接近深夜三時，幸好尚有一名婦人、一名中年男子，暫作歸家途中之伴。

甫下車，一隻瘦削的流浪狗，在不遠處瞪着下車的人，當然包括本人在內，起初掉以輕心，與之四目交頭後，就繼續我路。怎料走了不出十步，發現此狗竟然亦步亦趨，中年男子見狀，拿手上的雜誌敲打鐵欄，驅之。此畜生見狀，稍緩。

我馬上取出袋內縮骨遮，並除下隨身聽的耳筒，與婦人同時以急步前進。但此畜生還是以十步之距離，緊隨我們三人之後。

為免一人獨行會受此畜生襲擊，本人只好跟隨中年男子歸家路線，穿過從未行經的屋邨回家（本人一向走外圍，從未經屋邨而過）。而中年男子沿途亦不時以手上雜誌及隨手檢來的破傘驅趕畜生，使之不敢趨近。

惜中年男子比本人更早到達目的地，但他在進入閘口前問我家在何方，指點本人歸家之途，並贈上手上破傘，再對該畜生作最後驅趕。本人連聲道謝，取了破傘，趁畜生被趕之際，以極速離開。

畜生終於被擺脫，本人才把破傘丟掉。但在餘下的歸家路上，仍然心有餘悸。若然慘遭餓犬襲擊，即使大命不死，相信亦難逃破相之虞...

雖然同途之中年男子，與本人只是萍水相逢，但仍出手襄助，實在不勝感激！

畸@A記之無根(腦)兒童

話說畸初入A記，本來是栢奇門下，但未入門，柏門剛有新人入門，名額已滿，輾轉跌入雷門旗下，首個節目乃「性冷感衝動」。畸在雷門之放任政策下，返工首日就得以外景，並以9秒9 高速成長。

變幻原是永恒，在「冷感」即將埋尾之際，雷門另有「不舉」節目，畸又轉投羅門下，繼續「冷感」。

劇情峰迴路轉，「冷感」未完，畸又被調到「不舉」，再投雷門。惜「不舉」還未到埋牙階段，就改朝易代，羅而代之，畸再次轉投羅門下。

天有不測之風雲，「不舉」尚未埋尾，畸又偕雷門同到東瀛，製作4集30分鐘之節目「大比併」，期間再以驚人速度成長！

人算不如天算，回港後，畸變成無掃把之人，以獨力嘔出4集稿，過程極盡疲累之能事。期間得悉，下個節目「一個墟」，會另投四樓掃把STELLA，同期，出現痾症，電腦按掃把而分配，畸慘變無根(腦)兒童，嗚呼哀哉！

福禍難定，東瀛之「大比併」尚未完結，「一個墟」已胎死腹中，旋即再投羅門之「皇后」，由於「皇后」趕迫，「大比併」剛完馬上外景，同期接手「風水」尾集「職業」。

天意難測，「皇后」外景完事，又得悉即將離組，完成「職業」後，由羅門轉投「阿姐」大隊。

目前唯止，安排還未改變，未知24小時後，發展又會如何！欲知畸之去向，密切留意「畸@A記之無定向間歇性掃把迅速轉移綜合症候群」。

破紀錄

唔怪得之成日都聽到，人既潛力係無窮無盡......
本來以為自己係work hard play hard既人，做時做，但係玩點都唔少得，
點知破哂自己既紀錄，足足一個月無放假、無玩、無夜夜笙歌、無同人吹水......兼返香港之後，連續幾日返足一個對......
曾經以為自己唔放假係會死，但又死唔去......
仲有，足足半年冇放過大假，但係據估計，短期內放到大假既機會好微......
問我開唔開心，又好似幾開心，但係多啲錢會更開心......
有時又覺得自己唔多適合呢份工，或者應該係想試下自己以前想做既嘢......
不過都係得個諗字......
個個都話做傳媒冇前/錢途，但畀你做到有前/錢途個行，都唔代表你一定掂...或者開心...
其實做人好簡單，有機會咪把握，想做咪去做，好過老咗先嚟悔，
不過「機會」係留畀有準備既人，而「想做就去做」就要有條件去backup。坐係度怨天由人，結果都係得個桔......
給各位在事業、或者愛情上，都唔知點算既朋友們一句忠告：順心而行！